إختباري

أكثر حاجة شدّتني و دهشتني هي إنّو المسيح إختار باش يموت من أجلي أنا ومن أجل كلّ البشريّة بش تتغفر ذنوبي وهذا يوريني عظمة المحبّة الإلهيّة لينا نحن البشر، على خاطر في المحبّة البشريّة مهما كبرت عمرها ما بش تخلّي إنسان يفدي حياتو من أجل إنسان آخر. 

قريت الكتاب المقدس إلي كنت نستخالو محرف كيما قالولي في المدرسة وفي الجامع. قريتو وزدت قريتو و كنت نلوج على تحريف إل كلمة ربي. أما لقيت تحريف اخر... تحريف لل قلوب من شر و الخطيه لل نعمة والخير تأثّرت بكل كلمة فيه و كل حرف كان يحكي معايا و يمس قلبي، في العهد القديم قريت كيفاش الله خلق الدنيا و كيفاش فدى شعبو برشة مرات و كيفاش كان يحضر فينا القدوم المسيح، وأي الانجيل قريت الموعظة على الجبل ومستل قلبي برشة على خاطر فيها كلام عمري ما سمعتو من حتّى إنسان ولا قريتو في حتّى كتاب أخر وتأكدت اللّي هذايا مستحيل يكون كلام بشري كيما يقولو برشة ناس و ما يكون كان كلام ربي. 

وأنا نقرا في الكتاب المقدس حسيت إلي ربي يكلّم فيا وجاوبني على برشة أسئلة كانت محيّرتني. و لقيت إلي المسيح وحدو هوالحقّ و اللّي هو الطّريق الوحيد للحياة الأبديّة، الحياة ألي أعطهلنا ربي في شخصو. سلّمتو روحي و حياتي وأمنت بيه وبخلصي على يديه و بديت نمشي معاه كلّ يوم يدي في يدو. عرفت إلي هو الوحيد إلي ينجم يوصلني إل ملكوت إسماء وشوف الملكوت هذا فال دنيا هذي. قبل ما نعرف المسيح، كنت انسان عاديّ نتبّع الدّين اللّي تولدت عليه و اللّي لقيت عايلتي تبّع فيه، الدّين إلي قريتو في الكوتاب و تعلمتو في المدرسة. كنت إنسان متديّن متعلّق بالشّريعة و القوانين اللّي كنت نشوفها الاهيّة. و كنت وليد عاقل حدّي حدّ روحي نحول نرضي ربي ووالدي، متربيّ و قراي علاقل هذا آش كان يقولو عليا النّاس ، أما النّاس ما كانوش يشوفو في قلبي، كانو يشوفو كان القشرة البرّانيّة. صحيح أنا كنت عاقل و متربّي و مازلت، أما كنت نكذب برشة أما كنت في عينين النّاس نوّارة على خاطرني كنت متديّن و رزين. كيف عرفت الحقّ، المسيح عمل فيّ بطريقة موش عاديّة و غيّر فيّ حاجات خيبة برشة و حرّرني من حاجات ما كنتش نجّم نحّيهم وحدي. و ملّي كنت نوّارة في عينين النّاس وقت الخطيّة، توّا ولّيت بالنّسبة ليهم خايب على خاطرني ما عادش كيفهم. أما هذا ميهمش خاطر ملّي آمنت بالمسيح و قبلتو، حياتي تغيّرت، أي نعم أنا تغيّرت.. صحيح هي ثنيّة صعيبة و مش ساهلة. أما المسيح علّمني كيفاش نعيش حياتي من جديد... علمني كيفاش نحب و نقول لناس إلي نحبهم نحبكم، أي نعم نحبكم برشا برشا. علمني نحب الخير إلي في ناس ونرى الباهي في عدوية ال درجة إلي معدش نكره حد... علمني كيفاش مندين حتى حد و منتكلمش بالخيب حتى عالناس إلي متحبنيش. اليوم تعلمت نشوف، نشوف لحياة بعينيه... هذكا علاش شفت الخير النعمة والفرحة والمحبة... شفت دنيا أخرى... دنيا نحبك إنتي زادة تشوفها .